Sərgi haqqında

Qafqaz Beynəlxalq  Mehmanxana, Restoran və Supermarketlər üçün Avadanlıq və Ləvazimatlar Sərgisi 10-12 iyun tarixlərində Bakı Ekspo Mərkəzində baş tutacaq. Cənubi Qafqaz və Xəzəryanı regionda qonaqpərvərlik sənayesinin ixtisaslaşmış tədbiri olan “HOREX Caucasus” sərgisində aparıcı yerli və xarici istehsalçıların məhsul və xidmətləri ilə tanış olmaq, təcrübə mübadiləsi aparmaq və ən son sənaye yeniliklərinin mərkəzində olmaq fürsəti yaradılacaq. 

Sərgi çərçivəsində yerli və xarici istehsal şirkətləri və distribyutorları turizm xidmətlərinin yüksək səviyyədə təqdim olunmasını təmin edən müasir məhsullar və yeni texnologiyalar təqdim edirlər. Sərginin ziyarətçiləri arasında iaşə şəbəkələrinin müdirləri, alış menecerləri, supermarket, hipermarket sahibləri, topdan satıcılar və distribyutorlar, daxili dizaynerlər, otel şəbəkələrinin nümayəndələri və bir çox digər sahə mütəxəssisləri var.

Sərgi Azərbaycan Respublikasının Kiçik və Orta Biznesin İnkişafı Agentliyi (KOBİA) və Azərbaycanda İxracın və İnvestisiyaların Təşviqi Fondu (AZPROMO) tərəfindən dəstəklənir. Sərginin təşkilatçısı qismində “Caspian Event Organisers” şirkəti çıxış edir.